Qorxan və ya geniş müalicə lazım olan uşaqlar üçün anestezioloq nəzarətində sakit müalicə.
Sedasiya uşağın dərman vasitəsilə sakit və yuxulu vəziyyətə gətirilməsidir. Bu zaman uşaq daha sakit olur və müalicəni onu kresloda zorla saxlamadan aparmaq mümkün olur. Sedasiyanı anestezioloq aparır və bütün müalicə boyu uşağın nəfəsini, nəbzini və oksigen səviyyəsini izləyir.
Kimə tövsiyə olunur
Diş həkimindən güclü qorxusu olan və müalicəyə imkan verməyən uşaqlara
Uzun müddət kresloda qala bilməyən kiçik yaşlı uşaqlara
Bir neçə dişində geniş müalicə lazım olan uşaqlara
Xüsusi qayğıya ehtiyacı olan, o cümlədən müxtəlif sindromları olan uşaqlara, tibbi qiymətləndirmədən sonra
Hər uşağa sedasiya lazım deyil
Sedasiya rahatlıq üçün seçilən asan yol deyil. Uşaq oyunla, izahla və addım-addım tanışlıqla müalicəyə razı olursa, sedasiyasız işləyirik. Göstəriş olduqda isə sedasiya uşağın təhlükəsizliyini, müalicənin keyfiyyətini və diş həkiminə gələcək münasibətini qoruyan tibbi yanaşmadır.
Təhlükəsizlik necə təmin olunur
Sedasiyadan əvvəl uşağı müayinə edir, rentgenə baxır və müalicə planını hazırlayırıq
Uşağın pediatrından rəy alırıq: keçirdiyi xəstəliklər, əməliyyatlar və qəbul etdiyi dərmanlar nəzərə alınır
Pediatr icazə vermədikdə prosedura başlamırıq: bəzən ən doğru qərar müalicəyə başlamamaqdır
Sedasiyanı anestezioloq aparır və uşağı müalicə boyu monitorla izləyir
Uşaq tam oyanana və vəziyyəti sabitləşənə qədər nəzarətimizdə qalır
Sedasiya günü valideyn nəyi bilməlidir
Acqarın qalma vaxtını anestezioloq dəqiq deyir, bu qaydaya mütləq əməl edin
Uşağı rahat geyindirin, sevimli oyuncağını özünüzlə götürün
Müalicədən sonra uşaq bir neçə saat yuxulu ola bilər, həmin gün yanında böyük olmalıdır
Yeməyə maye və yumşaq qidalarla başlayın, ağız keyidirsə, dodağını dişləməməsinə diqqət edin
Məqsədimiz təkcə dişləri yox, uşağın diş həkiminə gələcək münasibətini də qorumaqdır.